اردو کی برقی کتابیں

صفحہ اولکتاب کا نمونہ پڑھیں


زخمِ امید

جون ایلیا

ڈاؤن لوڈ کریں 

   ورڈ فائل                                                                 ٹیکسٹ فائل

غزلیں


دل تمنا سے ڈر گیا جانم

سارا نشہ اُتر گیا جانم


اک پلک بیچ رشتۂ جاں سے

ہر زمانہ گزر گیا جانم


تھا غضب فیصلے کا اِک لمحہ

کون پھر اپنے گھر گیا جانم


جانے کیسی ہوا چلی اک بار

دل کا دفتر بِکھر گیا جانم


اپنی خواب و خیال دنیا کو

کون برباد کر گیا جانم


تھی ستم ہجر کی مسیحائی

آخرش زخم بھر گیا جانم


اب بَھلا کیا رہا ہے کہنے کو

یعنی میں بے اثر گیا جانم


نہ رہا دل نہ داستاں دل کی

اب تو سب کچھ بسر گیا جانم


زہر تھا اپنے طور سے جینا

کوئی اِک تھا جو مر گیا جانم

***


کون سے شوق کِس ہوس کا نہیں

دل میری جان تیرے بس کا نہیں


راہ تم کارواں کی لو کہ مجھے

شوق کچھ نغمۂ جرس کا نہیں


ہاں میرا وہ معاملہ ہے کہ اب

کام یارانِ نکتہ رَس کا نہیں


ہم کہاں سے چلے ہیں اور کہاں

کوئی اندازہ پیش و پس کا نہیں


ہو گئی اس گِلے میں عمر تمام

پاس شعلے کو خاروخس کا نہیں


مُجھ کو خود سے جُدا نہ ہونے دو

بات یہ ہے میں اپنے بس کا نہیں


کیا لڑائی بَھلا کہ ہم میں سے

کوئی بھی سینکڑوں برس کا نہیں

***


ڈاؤن لوڈ کریں 

   ورڈ فائل                                                                 ٹیکسٹ فائل

پڑھنے میں مشکل؟؟؟

یہاں تشریف لائیں۔ اب صفحات کا طے شدہ فانٹ۔

   انسٹال کرنے کی امداد اور برقی کتابوں میں استعمال شدہ فانٹس کی معلومات یہاں ہے۔

صفحہ اول