صفحہ اولکتاب کا نمونہ پڑھیں
یا حیُّ یا قیّوم
(کلیاتِ حفیظ تائب سے حمد و مناجات کا انتخاب)
جمع و ترتیب: محمد بلال اعظم
ڈاؤن لوڈ کریں
ورڈ فائل ٹیکسٹ فائل
محامد
کس کا نظام راہ نما ہے افق افق
کس کا دوام گونج رہا ہے افق افق
شانِ عیاں کس کی عیاں ہے جبل جبل
رنگِ جمال کس کا جما ہے افق افق
کس کے لئے نجوم بکف ہے روش روش
بابِ شہود کس کا کھُلا ہے افق افق
کس کے لئے سرودِ صبا ہے چمن چمن
کس کے لئے نمودِ ضیا ہے افق افق
مکتوم کس کی موجِ کرم ہے صدف صدف
مرقوم کس کا حرفِ وفا ہے افق افق
کس کی طلب میں اہلِ محبت ہیں داغ داغ
کس کی ادا سے حشر بپا ہے افق افق
سوزاں ہے کس کی یاد میں تائبؔ نفس نفس
فرقت میں کسی کی، شعلہ نوا ہے افق افق
٭٭٭