صفحہ اولکتاب کا نمونہ پڑھیں
تیرے تن کا کیسر مہکے
سرمد صہبائی
ترتیب: اعجاز عبید
ڈاؤن لوڈ کریں
ورڈ فائل ٹیکسٹ فائل
تیری بیل چڑھوں
تیری بیل چڑھوں میں سانول
تیری بیل چڑھوں
خوشبو کے مدھم کن رس میں
اپنا بھید کہوں
تیری بیل چڑھوں
تیرے شہد بھرے ہونٹوں سے
پیاسی گود بھروں
تیری بیل چڑھوں
ہم آغوشی کے موسم میں
کلی سے پھُول بنوں
تیری بیل چڑھوں
رنگ اور خوشبو جیسے بچے
تیرے سنگ جنوں
تیری بیل چڑھوں میں سانول
تیری بیل چڑھوں
٭٭٭
غزل
آنکھوں سے پرے نیند کی رفتار میں رہنا
ہر پل کسی نا دید کے دیدار میں رہنا
کھو جانا اسے دیکھ کے عریاں کے سفر میں
چھوتے ہی اسے حجلہ اسرار میں رہنا
اک خوابِ دریدہ کو رگِ حرف سے سینا
پھر لے کے اسے کوچہ و بازار میں رہنا
خود اپنے کو ہی دیکھ کے حیران سا ہونا
نرگس کی طرح موسمِ بیمار میں رہنا
مرنا یونہی ابریشم و کمخواب ہوس میں
دم توڑ کے زندہ کبھی دیوار میں رہنا
بادل کبھی پُروا کبھی پھولوں سے لپٹنا
ہر لمحہ تیرے آنے کے آثار میں رہنا
حسرت سی لیے خلقت معصوم میں پھرنا
سازش کی طرح گردشِ دربار میں رہنا
سرمد تپش نار سخن میں ہوں کہ مجھ کو
گل کرتا رہا شعلہ و انگار میں رہنا
٭٭٭