صفحہ اولکتاب کا نمونہ پڑھیں
سکھ شعراء کی عقیدتیں
جمع و ترتیب: ارشد خالد، اعجاز عبید
ڈاؤن لوڈ کریں
ورڈ فائل ٹیکسٹ فائل
پورن سنگھ ہنرؔ
جب لعینوں کے مقابل علی اکبرؑ نکلے
تیر، شمشیرو سناں ، نیزہ و خنجر نکلے
دین کی سمت اندھیروں نے اٹھائے جو قدم
جگمگاتے ہوئے فانوس بہتّر نکلے
بیعتِ فاسق انہیں کیسے گوارا ہوتی
باندھ کر سر پر کفن آلِ پیمبرؐ نکلے
قابلِ دید ہے اولاد پیمبرؐ کا جہاد
فقر و فاقے پہ بھی یہ لوگ تونگر نکلے
لذتِ صبر ہے روکے ہوئے شہہ کو ورنہ
آپ چاہیں تو ہر اک ذرے سے کوثر نکلے
حق ہر اک دور میں باطل پہ رہے گا غالب
چائے کیسا ہی کیوں نہ ستمگر نکلے
فہم و ادراک سے بالا ہے مقام شبیرؑ
غیر ممکن ہے کوئی اس کے برابر نکلے
یاد جس وقت مجھے شہہؑ کی شہادت آئے
اشک بن بن کر میری آنکھ سے گوہر نکلے
منقبت ابنِ علیؑ کی ہے غزل گوئی نہیں
منہ سے ہر لفظ ہنرؔ سوچ سمجھ کر نکلے
٭٭٭