صفحہ اولکتاب کا نمونہ پڑھیں
صلیب بر دوش
اقبال متین
ڈاؤن لوڈ کریں
ورڈ فائل ٹیکسٹ فائل
غزلیں
درد لے جاتا ، زیاں لے جاتا
کون یہ تحفۂ جاں لے جاتا
میں کہ لرزاں تھا جھکی شاخوں میں
مجھ کو جھونکا بھی کہاں لے جاتا
مجھ کو کیوں ڈھانپ دیا، شاید میں
جل نہ سکتا تو دھواں لے جاتا
اتنا ارزاں ہے یہ بازارِ وفا
میں کہاں جنسِ گراں لے جاتا
تیرا کمرہ ہے ، مگر تو ہی نہیں
تو ہی آتا ، یہ سماں لے جاتا
تو مرا دوست ہے اے کاش کہ تو
آہ دے جاتا ، فغاں لے جاتا
اتنا پندار تو ہوتا مجھ میں
تو مکیں تھا ، میں مکاں لے جاتا
میں تو اس کا ہی تھا اقبال ؔمتین
اس کا جی چاہے جہاں لے جاتا
٭٭٭
سایہ سایہ نہیں ہے رکنا مت بھولو
چہرہ دھولو، بالوں میں کنگھی کر لو
آنسوؤں پی کر شام کو ہنسنا مت بھولو
گہرا پانی ، سرد ہوا اور کالی را
پھر بھی اونچائی سے اتر نا مت بھولو
دن کے سارے ہنگاموں سے بچ نکلو
شام ہمارے دل میں چھپنا مت بھولو
میں اس کا ہوں ، میں نے کب انکار کیا
وہ کس کا؟ اور وہ بھی کتنا مت بھولو
خواب بھی دیکھو ، سوچو اُس کو، رو بھی لو
یاد آئے تو، اس کو اتنا مت بھولو
ہمری اتنی بات سنو ، اقبالؔ متین
ہم کو اپنے دل میں رکھنا مت بھولو
٭٭٭
دور تلک بارش کا سماں
بھیگی آنکھیں ، قلب تپاں
پاؤوں میں چاندی کی چین
آنکھوں میں سونے کا سماں
ٹیڑھی میڑھی پگڈنڈی
گوری کے قدموں کے نشاں
ہونٹوں پر صحرا کی پیاس
آنکھوں میں برسات نہاں
میں بھی اس کا تھا لیکن
اس کے دل میں کوئی کہاں
اُس کی آنکھیں جھیل ہی جھیل
میرے آنسو آبِ رواں
تجھ کو پا لینے کی ہوس
تجھ کو کھونے کے امکاں
سنتے ہو اقبالؔ متین
وہ تو نہیں ، تم سا ناداں
٭٭٭