صفحہ اولکتاب کا نمونہ پڑھیں
انتخاب قائم چاند پوری
قائم چاند پوری
ترتیب و تدوین: فرخ منظور
ڈاؤن لوڈ کریں
ورڈ فائل ٹیکسٹ فائل
غزلیں
گہہ ہوئی صبح گاہ شام ہوئی
عمر انہیں قصوں میں تمام ہوئی
رنجش آگے جو خاص تھی ہم سے
وائے طالع کہ وہ بھی عام ہوئی
کس گرفتار پر ہوا ہے یہ قہر
جو بلا مجھ پہ زیرِ دام ہوئی
وہی سمجھے ہے رمزِ حکمتِ عین
جس سے وہ چشم ہم کلام ہوئی
یہ بھی نالے کا طور ہے قائم
خواب اِک خلق پر حرام ہوئی
٭٭٭
شب غم سے ترے جان ہی پر آن بنی تھی
جو بال بدن پر ہے سو برچھی کی انی تھی
شب گریہ سے وابستہ مری دل شکنی تھی
جو بوند تھی آنسو کی سو ہیرے کی کنی تھی
بے دردی ہے فرہاد سے نسبت مجھے کرنا
آخر یہ جگر کاوی ہے وہ کوہ کنی تھی
میں کشتہ ہوں اسباب کا تیرے شہدا کا
گر چلتے میں کچھ ساتھ لیا بے کفنی تھی
یک عمر رکھی غرق بہ خوں چاکِ گریباں
ہم کو بھی کبھو خواہشِ گل پیرہنی تھی
اب گریہ تعجب ہے تجھے لختِ جگر کا
اِک وقت تو یاں کانِ عقیقِ یمنی تھی
قائم میں غزل طور کیا ریختہ ورنہ
اِک بات لچر سی بہ زبانِ دکھنی تھی
٭٭٭