صفحہ اول کتاب کا نمونہ پڑھیں
پہلا سلام
کیفی اعظمی
ترتیب: اعجاز عبید
ڈاؤن لوڈ کریں
ورڈ فائل ٹیکسٹ فائل
پہلا سلام
اٹھتی جھکتی نگاہوں میں کوئی پیام
کیسے بھولوں کسی کا وہ پہلا سلام
پھول رخسار کے رسمسانے لگے
ہاتھ اُٹھا قدم لڑکھڑانے لگے
رنگ سا خال و خد سے چھلکنے لگا
سر سے رنگین آنچل ڈھلکنے لگا
اجنبیت نگاہیں چرانے لگی
دل دھڑکنے لگا لہر آنے لگی
سانس میں اک گلابی گرہ پڑ گئی
ہونٹ تھرائے، سمٹے، نظر گڑ گئی
رہ گیا عمر بھر کے لئے یہ حجاب
کیوں نہ سنبھلا ہوا دے سکا میں جواب
کیوں میں بے قصد و بے عزم و بے واسطہ
دوسری سمت گھبرا کے تکنے لگا
٭٭٭
غزل
تم اتنا جو مسکرا رہے ہو
کیا غم ہے جس کو چھپا رہے ہو
آنکھوں میں نمی , ہنسی لبوں پر
کیا حال ہے کیا دکھا رہے ہو
بن جائیں گے زہر پیتے پیتے
یہ اشک جو پیے جا رہے ہو
جن زخموں کو وقت بھر چلا ہے
تم کیوں انکو چھیڑے جا رہے ہو
ریکھاؤں کا کھیل ہے مقدر
ریکھاؤں سے مات کھا رہے ہو
٭٭٭٭٭٭٭٭