صفحہ اولکتاب کا نمونہ پڑھیں
نبیؐ کا دیار آنکھوں میں
سید اقبال عظیم
جمع و ترتیب: اعجاز عبید
ؔ
ڈاؤن لوڈ کریں
ورڈ فائل ٹیکسٹ فائل
نعت
کیا خبر کیا سزا مجھ کو ملتی ، میرے آقاؐ نے عزت بچا لی
فردِ عصیاں مری مجھ سے لے کر، کالی کملی میں اپنی چھپا لی
وہ عطا پر عطا کرنے والے اور ہم بھی نہیں ٹلنے والے
جیسی ڈیوڑھی ہے ویسے بھکاری، جیسا داتا ہے ویسے سوالی
میں گدا ہوں مگر کس کے در کا؟ وہ جو سلطان کون و مکاں ہیں
یہ غلامی بڑی مستند ہے، میرے سر پر ہے تاج بلالی
میری عمر رواں بس ٹھہر جا، اب سفر کی ضرورت نہیں ہے
انؐ کے قدموں پہ میری جبیں ہے اور ہاتھوں میں روضے کی جالی
اِس کو کہتے ہیں بندہ نوازی، نام اِس کا ہے رحمت مزاجی
دوستوں پر بھی چشمِ کرم ہے ، دشمنوں سے بھی شیریں مقالی
میں مدینے سے کیا آگیا ہوں، زندگی جیسے بجھ سی گئی ہے
گھر کے اندر فضا سونی سونی، گھر کے باہر سماں خالی خالی
میں فقط نام لیوا ہوں انؐ کا، انؐ کی توصیف میں کیا کروں گا
میں نہ اقبال خسرو، نہ سعدی ، میں نہ قدسی نہ جامی، نہ حالی
٭٭٭