صفحہ اول کتاب کا نمونہ پڑھیں
موسم سے جدا خوشبو
شبنم شکیل
جمع و ترتیب: اعجاز عبید
ڈاؤن لوڈ کریں
ورڈ فائل ٹیکسٹ فائل
غزلیں
اندیشہ ہائے روزِ مکافات اور میں
اس دل کے بے شمار سوالات اور میں
خلقِ خُدا پہ خلقِ خدا کی یہ دارو گیر
حیراں خُدائے ارض و سماوات اور میں
کیا تھی خوشی اور اس کی تھی کیا قیمتِ خرید
اب رہ گئے ہیں ایسے حسابات اور میں
ہر لحظہ زندگی کی عنایات اور وہ
ہر لمحہ ایک مرگِ مفاجات اور میں
پہلے صداقتوں کے وہ پرچار اور دل
اب قول و فعل کے یہ تضادات اور میں
ہاروں گی میں ہی مجھ کو یہ وہم و گماں نہ تھا
آپس میں جب حریف تھے حالات اور میں
ہم راز و ہم سخن تھا مگر اس کے باوجود
ٹکرائے میرے دل کے مفادات اور میں
٭٭٭
یوں تو اوروں کو بھی ہر ممکنہ نعمت دی ہے
دینے والے نے مجھے کرب کی دولت دی ہے
کیا نہیں یہ بھی مشیت کی وسیع القلبی
مجھ کو ہر غم کے برتنے کی اجازت دی ہے
زندگی کا کوئی احسان نہیں ہے مجھ پر
میں نے دُنیا میں ہر اک سانس کی قیمت دی ہے
کس نے حق چھیننا سکھلایا جہاں والوں کو
کس نے ہر شخص کو اک طرزِ بغاوت دی ہے
صبح دم کس نے جلائے ہیں گلستاں میں چراغ
کس نے شبنم کے شراروں کو حرارت دی ہے
٭٭٭