خوابِ خوش رنگ

آصف شفیع

غزلیں

دل سے ملتا ہے سلسلہ دل کا

کون سمجھے معاملہ دل کا

لفظ اشکوں سے جگمگاتے ہیں

نعت ہوتی ہے آئنہ دل کا

تیرگی چھٹ گئی زمانے سے

کس نے روشن کیا دیا دل کا

اہلِ دنیا حرم سے لوٹ آئے

اس سے آگے تھا مرحلہ دل کا

سبز گنبد کے سائے میں اک دن

جا کے ٹھہرے گا قافلہ دل کا

ہو نہ سوزِ دروُں تو پھر آصفؔ

کیسے ظاہر ہو مدعا دل کا

ایک یوسف کے خریدار ہوئے ہیں ہم لوگ

پھر محبت میں گرفتار ہوئے ہیں ہم لوگ

چشمِ رنگیں کی کرامات سے گھایل ہو کر

تیری الفت کے طلبگار ہوئے ہیں ہم لوگ

شہرِ خوباں کی روایات سے شورش کر کے

غمِ ہجراں کے سزاوار ہوئے ہیں ہم لوگ

زندگی! تو نے ہمیں درد کے آنسو بخشے

پھر بھی تیرے ہی طرفدار ہوئے ہیں ہم لوگ

صبحِ آلام کا چہرہ نہیں دیکھا جاتا

خوابِ خوش رنگ سے بیدار ہوئے ہیں ہم لوگ

منزلِ عشق بھی ہم ہی کو ملی ہے آصفؔ

دشت و صحرا میں اگر خوار ہوئے ہیں ہم لوگ

٭٭٭٭٭٭٭٭