صفحہ اولکتاب کا نمونہ پڑھیں
جشن رنگ
حزیں صدیقی
ترتیب: مہ جبین، محمد امین
ڈاؤن لوڈ کریں
ورڈ فائل ٹیکسٹ فائل
غزلیں
ہر بام و در پہ یوں تو مچلتی ہے روشنی
کترا کے میرے گھر سے نکلتی ہے روشنی
مایوسیوں کی زد پہ ہے امید کی کرن
ٹلتی ہے غم کی رات نہ ڈھلتی ہے روشنی
بزمِ جہاں کے رنگ ہیں سورج سے مستعار
غازہ رخِ حیات پہ ملتی ہے روشنی
اک محشرِ صدا ہے خلاؤں میں عکس ریز
لہروں میں کروٹیں سی بدلتی ہے روشنی
ساحل سے دیکھ شوخیِ عکسِ مہِ تمام
موجوں کے ساتھ ساتھ اچھلتی ہے روشنی
اللہ اِن ضدوں کو شعورِ جمال دے
ملتے ہیں ذہن و دل تو نکلتی ہے روشنی
٭٭٭
ہم کیسے یہ کہہ دیں کہ نہیں کوئی ہمارا
مرنے کی تمنا بھی ہے جینے کا سہارا
لینا وہ گرا ٹوٹ کے دامانِ فلک سے
قسمت کا ستارا، مری قسمت کا ستارا
گرتے ہیں وہی جن کو سنبھلنا نہیں آتا
محتاج بنا دیتا ہے انساں کو سہارا
ہونے لگی جنبش مری مفلوج پروں میں
یہ کس نے مجھے اوجِ ثریا سے پکارا
بیٹھے رہیں وہ انجمنِ ناز سجائے
اب تو مری تنہائی ہے خود انجمن آرا
٭٭٭