اردو کی برقی کتابیں

صفحہ اول کتاب کا نمونہ پڑھیں


انتخاب بسمل عظیم آبادی

بسمل عظیم آبادی

ڈاؤن لوڈ کریں 

   ورڈ فائل                                                ٹیکسٹ فائل

غزلیں

سرفروشی کی تمنا اب ہمارے دل میں ہے

دیکھنا ہے زور کتنا بازوئے قاتل میں ہے


اے شہیدِ ملک و ملت میں ترے اوپر نثار

لے تری ہمّت کا چرچا غیر کی محفل میں ہے


وائے قسمت پاؤں کی اے ضُعف کچھ چلتی نہیں

کارواں اپنا ابھی تک پہلی ہی منزل میں ہے


رَہ روِ راہِ محبت! رہ نہ جانا راہ میں

لذّتِ صحرا نوردی دوری منزل میں ہے


شوق سے راہِ محبت کی مصیبت جھیل لے

اک خوشی کا راز پنہاں جادہ منزل میں ہے


آج پھر مقتل میں قاتل کہہ رہا ہے بار بار

آئیں وہ شوق شہادت جن کے جن کے دل میں ہے


مر نے والو آؤ اب گردن کٹاؤ شوق سے

یہ غنیمت وقت ہے خنجر کفِ قاتل میں ہے


مانعِ اظہار تم کو ہے حیا، ہم کو اَدب

کچھ تمہارے دل کے اندر کچھ ہمارے دل میں ہے


میکدہ سُنسان خم الٹے پڑے ہیں جام چور

سرنگوں بیٹھا ہے ساقی جو تری محفل میں ہے


وقت آنے دے دکھا دیں گے تجھے اے آسماں

ہم ابھی سے کیوں بتائیں کیا ہمارے دل میں ہے


اب نہ اگلے ولولے ہیں اور نہ وہ ارماں کی بھیڑ

صرف مٹ جانے کی اک حسرت دل بسملؔ میں ہے

٭٭٭


اب دَم بخود ہیں نبض کی رفتار دیکھ کر

تم ہنس رہے ہو حالتِ بیمار دیکھ کر


سودا وہ کیا کرے گا خریدار دیکھ کر

گھبرا گیا جو گرمی بازار دیکھ کر


اللہ تیرے ہاتھ ہے اب آبروئے شوق

دم گھٹ رہا ہے وقت کی رفتار دیکھ کر


دیتا کہاں ہے وقت پڑے پر کوئی بھی ساتھ

ہم کو مصیبتوں میں گرفتار دیکھ کر


آتے ہیں میکدے کی طرف سے جناب شیخ

سرگوشیاں ہیں لغزشِ رفتار دیکھ کر


غیروں نے غیر جان کے ہم کو اُٹھا دیا

بیٹھے جہاں بھی سایۂ دیوار دیکھ کر


آتے ہیں بزمِ یاران میں پہچان ہی گیا

میخوار کی نگاہ کو میخوار دیکھ کر


اس مدھ بھری نگاہ کی اللہ رے کشش

سو بار دیکھنا پڑا ایک بار دیکھ کر


تم رہنمائے وقت سہی پھر بھی چند گام

چلنا پڑے گا وقت کی رفتار دیکھ کر


وقتِ سحر گذر گئی کیا کیا نہ پوچھئے

گردن میں ان کی سوکھے ہوئے ہار دیکھ کر


تلچھٹ مِلا کے دیتا ہے رندوں کو ساقیا

ساغر پٹک نہ دے کوئی ہشیار دیکھ کر


بسملؔ کو کیا ہے چادرِ رحمت رسولؐ کی

سائے میں لے ہی لے گی گنہگار دیکھ کر

٭٭٭

ڈاؤن لوڈ کریں 

   ورڈ فائل                                                ٹیکسٹ فائل

پڑھنے میں مشکل؟؟؟

یہاں تشریف لائیں۔ اب صفحات کا طے شدہ فانٹ۔

   انسٹال کرنے کی امداد اور برقی کتابوں میں استعمال شدہ فانٹس کی معلومات یہاں ہے۔

صفحہ اول