صفحہ اولکتاب کا نمونہ پڑھیں
عذاب دل و جاں
عبداللہ ناظرؔ
ڈاؤن لوڈ کریں
ورڈ فائل ٹیکسٹ فائل
غزلیں
شام فرقت کیوں نہ مجھ کو وصل کا ارمان ہو
میں بھی اک انسان ہوں اور تم بھی اک انسان ہو
موت آ جائے تو ٹل جائے یہ ممکن ہے مگر
میرے وعدے کو نہ سمجھے کس قدر نادان ہو
بے نیازی بندہ پرور بے سبب ہے کس لیئے
کیوں چراتے ہو نظر کیوں جان کر انجان ہو
دشت غربت میں جنون عشق نے بہکا دیا
خیر و شر کے درمیاں کیسی مجھے پہچان ہو
آدمی خود گر چکا ہے اپنی ہی تدبیر سے
گر خدا چاہے تو سب کی زندگی آسان ہو
وہ تو یوں کہیئے مقدر میں جو تھا پورا ہوا
کس نے چاہا تھا کہ ناظرؔ بے سر و سامان ہو
٭٭٭
اعتبار شوق دل حد سے فزوں ہونے لگا
جانے پھر آرام جاں برباد کیوں ہونے لگا
ابر کی صورت بکھرتا جا رہا ہے میرا غم
آسماں پر منتشر سوز دروں ہونے لگا
غیر تو ہیں غیر اپنوں نے نگاہیں پھیر لیں
منکشف جب سے مرا حال زبوں ہونے لگا
توڑ کر کڑیاں محبت میں خیال و خواب کی
بے تحاشا نغمہ گر جوش جنوں ہونے لگا
کیا بتاؤں کس طرح سے کٹ رہی ہے زندگی
کب مجھے غربت کے صحرا میں سکوں ہونے لگا
دوستی کا حق ادا کرنا ترے بس میں نہ تھا
شرمساری کس لیئے کیوں سر نگوں ہونے لگا
تیر رکتے ہی نہیں ظالم نگاہ یار کے
کتنی بے دردی سے ناظرؔ میرا خوں ہونے لگا
٭٭٭